OMM Redaksiyası
“Neftçi”nin sabiq futbolçusu Pavel Dreksa “Sabah”ın Çempionlar Liqasında “Slaviya” üzərində qazandığı qələbə və Azərbaycan klubu ilə bağlı fikirlərini bölüşüb.
Çexiyalı müdafiəçi hazırda Kiprdə yaşayır və “Anagennisi Derineyas” klubunda çalışır. Dreksa futbolçu karyerasını iki il əvvəl Kiprdə başa vurduğunu, hazırda PRO lisenziyası almaq üçün işlədiyini bildirib.
O, əvvəl çıxış etdiyi komandaları izlədiyini, “Neftçi”nin oyunlarına da baxmağa çalışdığını deyib. Dreksanın fikrincə, Bakı klubunun heyətində yaxşı futbolçular var. O, “Neftçi”dəki vaxtını müsbət xatırladığını və Bakıya klubun ev oyununu izləmək üçün gəlməyi planlaşdırdığını qeyd edib.
“Sabah”ın “Slaviya”ya qarşı 2:0 hesablı qələbəsinin onu təəccübləndirdiyini söyləyən Dreksa, Azərbaycan klubunun hücum xəttində qol vura bilən keyfiyyətli futbolçular olduğunu vurğulayıb. O, “Slaviya”nın rəqibini lazımınca qiymətləndirmədiyi qənaətində deyil, lakin Çexiya klubunun fiziki oyun tərzinin Çempionlar Liqası səviyyəsi üçün yetərli olmadığını bildirib.
Dreksanın sözlərinə görə, Çexiyada “Slaviya”nın nəticəsi və oyunu tənqid olunub. O, məğlubiyyətin ölkənin reytinq əmsalına mənfi təsir göstərə biləcəyini, klubların büdcələri arasındakı fərqə görə belə nəticənin gözlənilmədiyini deyib.
