Azərbaycan klubları Çexiya təmsilçilərinə qarşı 12 oyunda qələbə qazanmayıb

UEFA Çempionlar Liqasının əsas mərhələsinin II turunda bu gün keçiriləcək “Sabah” – “Slaviya” oyunu Azərbaycan və Çexiya klublarının avrokuboklardakı 13-cü qarşılaşması olacaq.

Əvvəlki görüşlər

İndiyədək Azərbaycan klublarından “Qarabağ”, “Şəmkir” və “Karvan” çexiyalı rəqiblərlə üz-üzə gəlib. İlk belə duellər 1997/1998 mövsümündə baş tutub: “Qarabağ” UEFA Kubokunun I təsnifat mərhələsində “Yablonets”ə 0:3 və 0:5 hesabları ilə uduzub.

2000/2001 mövsümündə “Şəmkir” UEFA Çempionlar Liqasının II təsnifat mərhələsində “Slaviya”ya hər iki oyunda məğlub olub – 0:1 və 1:4. 2006-cı ildə isə “Karvan” Praqa klubuna evdə 0:2 hesabı ilə uduzub, səfərdə qolsuz heç-heçə edib.

2016-cı ildə “Qarabağ” Çempionlar Liqasının III təsnifat mərhələsində “Viktoriya Plzen”lə hər iki oyunda heç-heçə edib – 0:0 və 1:1. Çexiya klubu səfər qolu üstünlüyü ilə mərhələ adlayıb. Həmin mövsüm Ağdam təmsilçisi Avropa Liqasının qrupunda “Slovan”la Bakıda 2:2 hesablı heç-heçə edib, səfərdə isə 0:3 hesabı ilə uduzub.

2022/2023 mövsümünün Çempionlar Liqasının pley-off mərhələsində “Qarabağ” “Viktoriya”ya qarşı ilk oyunda 0:0 hesablı heç-heçə edib, cavab matçında 1:2 hesabı ilə məğlub olub. Beləliklə, Azərbaycan klubları Çexiya təmsilçiləri ilə əvvəlki 12 görüşdə qələbə qazanmayıb.

“Sabah” – “Slaviya” oyunu Bakı Olimpiya Stadionunda saat 20:45-də başlayacaq.