"Azeri Light" markalı Azərbaycan neftinin 1 barelinin qiyməti dünya bazarında 4,3 ABŞ dolları (və ya 3,36 %) artaraq 132,35 ABŞ dolları səviyyəsinə çatıb.
Bu barədə “Operativ Məlumat Mərkəzi-OMM”-ə neft bazarındakı mənbə məlumat verib.
Son hərracların nəticələrinə görə, "Brent" markalı neftin iyun fyuçerslərinin qiyməti 127,24 ABŞ dolları təşkil edib. Paralel olaraq, Türkiyənin Ceyhan limanında FOB bazasında "Azeri Light" markalı neftin bir barelinin qiyməti 4,5 ABŞ dolları (3,72 %) artaraq 125,55 ABŞ dolları olub. Müqayisə üçün qeyd edək ki, Azərbaycanın builki dövlət büdcəsində bir barel neftin orta qiyməti 65 ABŞ dollarından hesablanıb.
Tarixi statistikaya əsasən, "Azeri Light" neftinin ən aşağı qiyməti 2020-ci il aprelin 21-də (15,81 ABŞ dolları), maksimal qiyməti isə 2008-ci ilin iyulunda (149,66 ABŞ dolları) qeydə alınıb. Azərbaycanda bu markadan olan neft "Azəri-Çıraq-Günəşli" (AÇG) yataqlar blokunun işlənməsi haqqında müqavilə çərçivəsində hasil edilir. Həmin müqavilədə Azərbaycan Dövlət Neft Şirkətinin (SOCAR) payı 31,65 % təşkil edir.
