Afət Ziyadqızı
Fransada sentyabrın 17-dən etibarən şagirdlərin kütləvi etiraz aksiyaları fonunda təhsil müəssisələrinə dəymiş ağır zərər səbəbindən 30 mindən çox şagird həftələrlə əyani təhsildən məhrum olacaq.
"Operativ Məlumat Mərkəzi-OMM" xəbər verir ki, Fransanın Milli Təhsil naziri Eduar Geffre (Edouard Geffray) Milli Assambleyanın Mədəniyyət məsələləri komissiyasında çıxışı zamanı etirazlar zamanı 24 liseyin yandırıldığını və ya ciddi zədələndiyini bildirib
Nazir qeyd edib ki, sözügedən təhsil müəssisələrinin fəaliyyətinin bərpası həftələrlə vaxt aparacaq və dəymiş ziyanın ilkin həcmi on milyonlarla avro ilə qiymətləndirilir.
Təhsil şəraitinin yaxşılaşdırılması tələbi ilə başlayan aksiyalar qısa müddətdə ölkənin bir çox şəhərlərinə yayılaraq iğtişaşlara çevrilib.
Rəsmi məlumatlara görə, etirazlar başlayan gündən bəri hüquq-mühafizə orqanları tərəfindən 6 500-dən çox şəxs saxlanılıb. Toqquşmalar zamanı şagirdlər, müəllimlər və polis əməkdaşları da daxil olmaqla 1 000-dən çox insan xəsarət alıb.
