OMM Redaksiyası
Rusiya qadın cüdo millisinin baş məşqçisi Vladimir Deqtyaryov Bakıda keçirilən dünya çempionatına azarkeşlərin marağını yüksək qiymətləndirib. O, turnirin Beynəlxalq Cüdo Federasiyasının standartlarına uyğun təşkil olunduğunu bildirib.
Deqtyaryov “Matç TV”yə müsahibəsində yarışları izləmək üçün zala çoxsaylı azarkeşlərin gəlməsinin və onların fəal dəstəyinin xüsusi sevinc doğurduğunu deyib. Məşqçinin sözlərinə görə, Bakıda tribunalar süni şəkildə doldurulmayıb, tamaşaçılar cüdoya həqiqi maraq göstərirlər.
Rusiyalı mütəxəssis final bloklarından birində tribunada boş yer tapmağın çətin olduğunu da qeyd edib. O, hətta pilləkəndə belə oturmağa yer olmadığını vurğulayaraq yerli əhalinin cüdoya münasibətini müsbət qiymətləndirib.
Cüdo üzrə dünya çempionatı oktyabrın 4-dən 11-dək Bakıda keçirilir. Azərbaycan millisinin aktivində iki medal var: Əhməd Yusifov 50 kq çəki dərəcəsində dünya çempionu olub, Rəşid Məmmədəliyev isə 73 kq-da bürünc medal qazanıb. Medal sıralamasında Azərbaycan beş qızıl medal qazanan Yaponiyadan sonra ikinci yerdədir.
