OMM Redaksiyası
Azərbaycanın kişi cüdoçuları böyüklər arasında bir dünya çempionatında qazandıqları medalların sayına görə milli rekorda imza atıblar. Bakıda keçirilən dünya çempionatının dörd yarış günündən sonra yığmanın hesabında 1 qızıl, 1 gümüş və 2 bürünc medal var.
60 kq çəki dərəcəsində Əhməd Yusifov dünya çempionu olub. Zelim Tçkayev 81 kq-da gümüş, Rəşid Məmmədəliyev 73 kq-da, Ömər Rəcəbli isə 81 kq-da bürünc medal qazanıblar.
Əvvəlki nəticələrdən üstün göstərici
Azərbaycan cüdoçuları medalların ümumi sayına görə 2017-ci ildə Budapeştdə keçirilən dünya çempionatının nəticəsini təkrarlayıblar. Həmin yarışda kişilər üç, qadınlar isə bir medal qazanmışdı. Ancaq o vaxt yığmanın hesabında qızıl medal yox idi.
2025-ci ildə Budapeştdə keçirilən dünya çempionatında Azərbaycanın kişi cüdoçuları üç bürünc medal əldə etmiş, qadınlar isə mükafatçılar sırasına düşməmişdilər. 2018-ci ildə Bakıda təşkil olunan dünya çempionatında isə Uşanqi Kokauri gümüş, Hidayət Heydərov bürünc medal qazanmışdı.
Hazırkı nəticə 2024-cü ildə Əbu-Dabidə qazanılmış iki qızıl medaldan ibarət rekordu hələ üstələməyib. Dördüncü yarış günündən sonra Azərbaycan medal sıralamasında ikinci yerdədir. Yaponiya 6 qızıl və 2 bürünc olmaqla 8 medalla liderdir. Yarışlar oktyabrın 11-dək davam edəcək və fərdi yarışların başa çatmasına üç gün qalır.
