ABŞ Senatında DHS (Daxili Təhlükəsizlik Departamenti) və sərhəd qurumlarının maliyyələşdirilməsi ilə bağlı qərar qəbul olunub.
"Operativ Məlumat Mərkəzi-OMM"xəbər verir ki, ABŞ Senatı İmmiqrasiya və Gömrük Mühafizəsi (ICE) və Sərhəd Patrul Xidmətləri üçün növbəti üç il ərzində ümumilikdə 70 milyard dollarlıq maliyyələşdirməni təsdiqləyib.
Bildirilib ki, səsvermə Senatın rəsmi saytında canlı yayımlanıb və təşəbbüs Respublikaçılar tərəfindən irəli sürülüb. Demokratlar isə filibusterdən istifadə edərək qanun layihəsinin irəliləməsini bloklamağa çalışsalar da, bu cəhd uğursuz olub.
Məlumata görə, səsvermə nəticəsində 50 Respublikaçı senator layihəni dəstəkləyib, 46 Demokrat və 2 Respublikaçı isə əleyhinə səs verib. Qanun layihəsi indi Nümayəndələr Palatasına göndərilib və burada onun qəbul olunması ilə bağlı çətinliklərin olacağı ehtimal edilir.
Qeyd olunub ki, müzakirələr ABŞ-də immiqrasiya siyasəti və ICE əməliyyatları ətrafında artan gərginlik fonunda baş verir. Xüsusilə Minnesota ştatında həyata keçirilən “Metro Surge” əməliyyatı zamanı baş verən insidentlər və iki ABŞ vətəndaşının ölümü ictimai və siyasi debatları daha da kəskinləşdirib.
Xatırladılıb ki, həmin hadisələrdən sonra federal agentlərin fəaliyyətinə qarşı etirazlar güclənib və bəzi siyasətçilər ICE əməliyyatlarının yenidən nəzərdən keçirilməsini tələb ediblər.
