OMM Redaksiyası
ABŞ-nin vitse-prezidenti Cey Di Vens İranın Ali Milli Təhlükəsizlik Şurasının katibi Möhsün Rzaiyə məktub göndərib.
“Operativ Məlumat Mərkəzi-OMM” xəbər verir ki, bununla bağlı "Axios" adı açıqlanmayan ABŞ rəsmisinə istinadən məlumat yayıb.
Məktubda Vaşinqtonun ABŞ-nin zərbələrinin dayandırılması ilə bağlı danışıqları bərpa etməzdən əvvəl Tehranla nüvə məsələsini müzakirə etməli olduğu vurğulanıb.
Adı açıqlanmayan rəsminin sözlərinə görə, ABŞ Prezidenti Donald Tramp məktuba müsbət reaksiya verib. Mənbə məktubun nə vaxt göndərildiyini açıqlamaqdan imtina edib.
Möhsün Rzaiyə göndərilən məktub son aylarda ABŞ ilə İran arasında ən yüksəksəviyyəli təmas kimi qiymətləndirilir. Bu, Trampın aralıq seçkilərindən sonra İranda genişmiqyaslı hərbi əməliyyatları bərpa etməyi nəzərdən keçirdiyi barədə məlumatların yayıldığı bir vaxta təsadüf edir.
Danışıqların bərpası qarşısındakı əsas maneələrdən biri İranın ABŞ-dən əvvəlcə dəniz blokadasını aradan qaldırmağı, dondurulmuş İran aktivlərini açmağı və neft satışına icazə verməyi tələb etməsidir.
ABŞ isə hər hansı sanksiyanın ləğvindən əvvəl İranın nüvə proqramı ilə bağlı danışıqları bərpa etməsini istəyir.
Qeyd edək ki, oktyabrın 28-də Tramp jurnalistlərə açıqlamasında Vensin məktubunun İrana zəruri tibbi ləvazimatların çatdırılmasına köməklə bağlı olduğunu bildirib.
