OMM Redaksiyası
Ukraynanın pilotsuz uçuş aparatları ilə Rusiyanın Tula vilayətinə endirdiyi zərbələr nəticəsində iki nəfər ölüb. Bu barədə vilayətin qubernatoru Dmitri Milyayev məlumat verib.
Onun sözlərinə görə, hücumlar zamanı daha üç nəfər yaralanıb. Milyayev bildirib ki, gecə ərzində vilayət üzərində 26 dron məhv edilib.
Kiyevdə səkkiz nəfər yaralanıb
Rusiyanın cümə günü səhər Kiyevə həyata keçirdiyi hava hücumları nəticəsində yaralananların sayı səkkizə yüksəlib. Şəhər administrasiyasının məlumatına görə, zərbələr doqquzmərtəbəli yaşayış binasında yanğına səbəb olub.
Hücumdan əvvəl şəhər sakinlərinə dron təhlükəsi ilə əlaqədar sığınacaqlara getmək çağırışı edilib. Yanğınsöndürənlər yaşayış binasında baş verən hadisənin nəticələrini aradan qaldırmaq üçün çalışıblar.
Rusiyanın Saratov şəhərində yanğın
Ukraynanın dron hücumu Rusiyanın Saratov şəhərində elektron ticarət şirkəti “Ozon”a məxsus logistika mərkəzində yanğına səbəb olub. Şirkət hadisə nəticəsində xəsarət alanların olmadığını bildirib.
Saratov vilayətinin qubernatoru Roman Busargin dron hücumu nəticəsində mülki infrastrukturun zərər gördüyünü, lakin yaralananlarla bağlı məlumat daxil olmadığını açıqlayıb. Rusiyanın müstəqil “ASTRA” nəşri videoların təhlilinə əsasən, Saratovda dövlət enerji şirkəti “Rosneft”ə məxsus neft emalı zavodunda da yanğın baş verdiyini yazıb. Bu məlumat rəsmi qurumlar tərəfindən təsdiqlənməyib.
Ukrayna sərhəd xidməti hərbi texnikanın məhv edildiyini açıqlayıb
Ukrayna Dövlət Sərhəd Xidməti bildirib ki, ölkə qüvvələri zirehli döyüş maşını, yük və minik avtomobilləri, motosiklet, sursat və yanacaq anbarları, rabitə vasitələri və düşmənin sığınacaqları da daxil olmaqla bir sıra hərbi texnika və obyektləri məhv edib.
Xidmətin yaydığı məlumata görə, məhv edilən texnika arasında BM-21 “Qrad” yaylım atəş sistemləri və minaatan da olub.
