Afət Ziyadqızı
Türkiyə Cümhuriyyətinin şimalında yerləşən Zonquldak vilayətinin Kilimli rayonunun Gelik qəsəbəsindəki özəl daş kömür mədənində texnogen qəza — metan qazının sızması nəticəsində güclü partlayış baş verib. Hadisə nəticəsində ilkin rəsmi məlumatlara görə 2 mədənçi həlak olub, 5 nəfər isə müxtəlif dərəcəli xəsarətlər alıb.
"Operativ Məlumat Mərkəzi-OMM" xəbər verir ki, partlayışdan dərhal sonra əraziyə AFAD (Türkiyə Fövqəladə Halların İdarə Olunması Agentliyi), jandarma, təcili tibbi yardım və ixtisaslaşdırılmış dağ-mədən xilasedici komandaları cəlb edilib.
Mədən ocağında baş verən partlayış zamanı xəsarət alan 5 işçidən 2-sinin vəziyyətinin kəskin ağır olduğu bildirilir. Yaralılar dərhal ərazidəki xəstəxanalara təxliyə edilərək reanimasiya və intensiv terapiya şöbələrinə yerləşdiriliblər.
Səhiyyə və mülki müdafiə strukturları mədəndə yer altında başqa fəhlələrin qalıb-qalmadığını dəqiqləşdirmək məqsədilə axtarış-xilasetmə və təhlükəsizlik tədbirlərini davam etdirirlər.
Partlayışın dəqiq səbəblərinin, mədəndəki havada qaz konsentrasiyası göstəricilərinin və əmək mühafizəsi qaydalarına əməl olunub-olunmadığının müəyyənləşdirilməsi üçün adiyyəti dövlət qurumları və hüquq-mühafizə orqanları tərəfindən hərtərəfli rəsmi təhqiqat və araşdırma işlərinə start verilib.
