Arsen Venger Hövsan Yarış Kompleksində görülən işlərlə tanış olub

FIFA-nın Qlobal Futbol İnkişafı üzrə rəhbəri Arsen Venger Hövsan Yarış Kompleksində olub və idman qurğusunda görülən işlərlə tanış olub.

77 yaşlı fransalı funksioner Bakıya U-15 dünya çempionatı və festivalı ilə əlaqədar səfər edib. İngiltərənin “Arsenal” klubunun sabiq baş məşqçisi olan Venger turnirin keçiriləcəyi məkanlardan birinə baş çəkib.

Turnirin təqvimi

U-15 dünya çempionatı və festivalı oktyabrın 24-dən 30-dək Hövsan Yarış Kompleksində təşkil olunacaq. Açılış və final görüşləri Bakı Kristal Zalında keçiriləcək. Yarışın ilk oyunları oktyabrın 24-də başlayacaq. Turnirdə 189 ölkənin iştirakı və 1000-ə yaxın matçın keçirilməsi nəzərdə tutulur.

Azərbaycan millisi ilk oyununu oktyabrın 24-də saat 19:30-da Bakı Kristal Zalında Timor-Leste yığmasına qarşı keçirəcək. Oktyabrın 25-də komanda saat 12:45-də Andorra, saat 19:30-da isə Avstraliya yığması ilə qarşılaşacaq. Hər iki oyun Hövsan Yarış Kompleksinin 10A meydançasında baş tutacaq.

Azərbaycan millisi oktyabrın 26-da həmin meydançada saat 11:30-da İsrail, saat 18:15-də isə Haiti yığması ilə üz-üzə gələcək.