OMM Redaksiyası
“Sampdoriya”nın hücumçusu Lorenzo Mezzoteronun Azərbaycan millisinə dəvət alması İtaliya idman mediasında müzakirələrə səbəb olub. 18 yaşlı futbolçu “Virtus Entella” ilə qarşılaşmada peşəkar karyerasının ilk qolunu vurub, daha əvvəl isə Azərbaycanın U-21 yığmasında üç oyun keçirib.
“TuttoMercatoWeb” jurnalisti Tommazo Maskio başlığında Azərbaycanın “vaxt itirmədiyini və İtaliyanı qabaqladığını” yazıb. “Chiamarsi Bomber”dən Culio Piras isə İtaliyanın 2008-ci il təvəllüdlü istedadı itirmək riski ilə üzləşə biləcəyini qeyd edib. “Samp News 24”də Elia Serra bu vəziyyətin ikili vətəndaşlığı olan gənclərin vaxtında cəlb olunması ilə bağlı suallar yaratdığını bildirib.
FIFA qaydaları
Həmin nəşrin digər jurnalisti Mariya Floris dəvəti Mezzoteronun inkişafının göstəricisi sayıb. “Club Doria 46”dan Marko Qrassinyi isə çağırışı futbolçunun çıxışlarının mükafatı kimi təqdim edib.
Çağırış futbolçunun Azərbaycanı birdəfəlik seçməsi demək deyil. FIFA qaydalarına əsasən, əsas millidə üçdən çox oyun keçirməyən futbolçu müəyyən şərtlərlə başqa yığmanı təmsil edə bilər. Bunun üçün son rəsmi oyun 21 yaş tamam olmamışdan əvvəl keçirilməli, həmin oyundan sonra ən azı üç il ötüşməli, futbolçu isə dünya və ya qitə çempionatının final mərhələsində oynamamalıdır. Dörd və daha çox oyun, onlardan azı biri rəsmi olmaqla, bu keçid imkanını aradan qaldırır. U-21-dəki oyunlar həmin limitə daxil deyil.
“Diario del Web”dən Filippo Vinsentçi dəvətin oyunda iştirak demək olmadığını vurğulayıb. Azərbaycan noyabrın 13-də səfərdə Lixtenşteynlə Millətlər Liqasında, noyabrın 16-da isə Andorra ilə yoldaşlıq görüşündə qarşılaşacaq.
