Afət Ziyadqızı
Çin Xalq Respublikasının Tibet Muxtar Rayonunda kəskin yeraltı təkanlarla müşayiət olunan şiddətli zəlzələ baş verib. İlkin rəsmi məlumatlara görə, təbii fəlakət nəticəsində 16 nəfər həlak olub, 32 nəfər isə müxtəlif dərəcəli bədən xəsarətləri alıb.
"Operativ Məlumat Mərkəzi-OMM" xəbər verir ki, təbii fəlakətin episentri Tibet Muxtar Rayonunun Nakçu vilayətinin Baçin rayonunda qeydə alınıb. Güclü yeraltı təkanlar nəticəsində 300-dən çox yaşayış evi və mülki infrastruktur obyekti tamamilə dağılıb.
Səhiyyə qurumlarının bildirdiyinə görə, xəsarət alanlardan 11 nəfərin vəziyyəti kəskin ağır olaraq qalır. Yüngül xəsarət alan 21 sakinin müalicəsi isə xəstəxanalarda davam etdirilir.
Fəlakət zonasında təcili axtarış-xilasetmə və fəsadların aradan qaldırılması tədbirlərinə 300 polis əməkdaşı, habelə 347 nəfərdən ibarət yanğınsöndürən və ixtisaslaşdırılmış xilasedici heyət cəlb olunub. Dağıntılar altında qalanların olması səbəbindən insan tələfatının və yaralı sayının artacağı istisna edilmir.
ABŞ Geoloji Xidmətinin (USGS) və Çin Zəlzələ Şəbəkələri Mərkəzinin (CENC) məlumatına görə, zəlzələnin maqnitudası Rixter şkalası ilə 7.0 təşkil edib. Təbii fəlakətin episentri Nakçu şəhərindən 183 kilometr şimal-şərqdə, 10 kilometr hiposentr dərinliyində yerləşib.
Xatırladaq ki, 2025-ci ilin yanvar ayında Tibetin Şiqatse vilayətinin Tinri rayonunda qeydə alınan 6.8 maqnitudalı zəlzələ zamanı 120 nəfər həlak olmuşdu.
