Afət Ziyadqızı
Amerikalı sahibkar və milyarder İlon Mask rəhbərlik etdiyi “SpaceX” aerokosmik şirkəti ilə “Tesla” elektromobil istehsalçısının mümkün birləşməsi (fəaliyyətlərinin konsolidasiyası) perspektivinə müsbət münasibət bildirib.
“Operativ Məlumat Mərkəzi-OMM”-in "TASS" agentliyinə istinadən yaydığı məlumata əsasən, İ.Mask bu barədə “SpaceX” şirkətinin üçüncü rüb üzrə maliyyə və fəaliyyət yekunlarına həsr olunmuş təqdimatında danışıb.
İlon Mask hər iki transmilli nəhəngin birləşdirilməsi ideyasını “yaxşı və səmərəli fikir” kimi qiymətləndirərək, tərəflər arasında strateji dialoqun başladığını təsdiqləyib. O bildirib ki, səhmdarların rəsmi müraciəti əsasında həm “SpaceX”, həm də “Tesla”da xüsusi işçi qrupları və müstəqil direktorlardan ibarət komissiyalar yaradılıb.Həmin komitələr mümkün birləşmənin hüquqi, maliyyə və texnoloji aspektlərini araşdıracaq.
Eyni zamanda, Mask maraqlar münaqişəsinin qarşısını almaq üçün bitərəf mövqe tutduğunu və komitələrin müzakirələrində birbaşa iştirak etmədiyini diqqətə çatdırıb.
Tənzimləyici maliyyə hesabatlarına əsasən, İlon Mask “SpaceX” şirkətinin aksiyalarının 48,4 faizinə sahibdir. Səsvermə hüququ artırılmış xüsusi səhmlər hesabına isə o, şirkətdəki səs hüququnun 82 faizindən çoxuna birbaşa nəzarət edir. Maskın “Tesla” korporasiyasındakı payı isə təxminən 20 faiz təşkil edir.
Ekspertlər hesab edirlər ki, iki nəhəng şirkətin birləşməsi süni intellekt, robototexnika, yarımkeçirici çiplərin istehsalı və peyk rabitəsi sahəsində qlobal miqyasda nəhəng texnoloji konqlomeratın yaranmasına gətirib çıxara bilər.
