OMM Redaksiyası
FIFA prezidenti Canni İnfantino 2027-ci ildə keçiriləcək U-20 dünya çempionatının tarixlərini açıqlayıb. Turnir sentyabrın 17-dən oktyabrın 9-dək Azərbaycan və Özbəkistanda təşkil olunacaq.
İnfantino şəxsi “Instagram” hesabında yazıb ki, Azərbaycan və Özbəkistan dünyanın ən yaxşı gənc futbolçularını qarşılamağa və bir araya gətirməyə hazırlaşır. FIFA rəhbəri iştirakçılara uğurlar arzulayıb və “orada görüşənədək” deyə qeyd edib.
Dünya çempionatında 24 komanda mübarizə aparacaq. Turnirin rəsmi brendi oktyabrın 16-da təqdim olunub. Gənc futbolçulara və onları dəstəkləyən azarkeşlərə ünvanlanan “Bu oyun sənlikdir” şüarı yeni nəsil futbol ulduzlarını tarix yazmağa dəvət edir.
Brendin təqdimatı Bakının simvolik məkanlarından olan Qız Qalasına, eləcə də Bakı Olimpiya Stadionuna xüsusi proyeksiya ilə nümayiş etdirilib.
Kontekst
2026-cı il sentyabrın 29-da İlham Əliyev Canni İnfantino ilə görüşündə Azərbaycanda U-20 dünya çempionatına hazırlıq işlərinin yüksək səviyyədə aparıldığını bildirmişdi.
