Türkiyə və İran sərhəddə sərnişin keçidini qismən məhdudlaşdırıb

Türkiyə və İran arasındakı ortaq sərhəd-keçid məntəqələrində gündəlik sərnişin keçidi müvəqqəti olaraq dayandırılıb.

"Operativ Məlumat Mərkəzi-OMM" xəbər verir ki, bu barədə Türkiyənin ticarət naziri Ömər Bolat məlumat verib.

Qərar ABŞ və İsrailin İrana qarşı başlatdığı hərbi kampaniyanın üçüncü günündə qəbul edilib.

Nazir Ömər Bolatın bəyanatına görə, hazırda sərhəddə hərəkət aşağıdakı qaydada tənzimlənir:

• İran gömrük rəsmiləri öz vətəndaşlarının Türkiyə ərazisindən keçərək ölkələrinə qayıtmasına icazə verir;
• Türkiyə tərəfi isə öz vətəndaşlarının və üçüncü ölkə vətəndaşlarının İrandan Türkiyəyə daxil olmasını təmin edir;
• Sərhəddə yük daşımaları (karqo trafiki) kəsilmədən, normal rejimdə davam edir.

"Bütün sərhəd keçidləri İran rəsmiləri və müvafiq qurumlarımızla sıx koordinasiya şəraitində idarə olunur", - deyə nazir bildirib.

O əlavə edib ki, ticarət axınının davamlılığını təmin etmək üçün bütün bölmələr yüksək hazırlıq vəziyyətində xidmət aparır.