İran parlamentinin sədri Məhəmməd Baqir Qalibaf ABŞ-nin yeni müdafiə naziri Pit Heqsetin İranın neft tankerlərinin “məhv edilərək batırılacağı” ilə bağlı açıqlamasına sərt reaksiya verib.
“Operativ Məlumat Mərkəzi-OMM” xəbər verir ki, Qalibaf bu barədə sosial media hesabında paylaşım edib.
İranlı rəsmi bölgədə neft və təbii qaz hasilatı infrastrukturunun geniş əraziyə yayıldığını və təhlükəsizlik baxımından həssas olduğunu vurğulayıb.
Qalibaf ABŞ-nin mümkün hücumlarına qarşı xəbərdarlıq edərək, bölgədə fəaliyyət göstərən Amerika neft və qaz şirkətlərinin obyektlərinin də müdafiəsiz olduğunu bildirib.
“Bizim varlıqlarımıza hücum etsəniz, siz də hücuma məruz qalacaqsınız. Bunu keçmişdə sübut etmişik. Artıq istifadəyə yararsız olan bazalarınıza baxın və nəticə çıxarın”, – deyə Qalibaf qeyd edib.
ABŞ və İran arasında son gərginlik sentyabrın 5-də ABŞ müdafiə naziri Pit Heqsetin “X” platformasındakı paylaşımından sonra yaranıb.
Heqset İranın ABŞ gəmilərinə atəş açacağı təqdirdə Vaşinqtonun İranın neft tankerlərini “məhv edib batıracağını” bildirib.
ABŞ rəsmisi həmçinin İranın neft tankerləri donanmasının müdafiəsiz olduğunu və Amerika təyyarələri, hərbi gəmiləri və sualtı qayıqlarının həmin gəmiləri asanlıqla hədəfə ala biləcəyini iddia edib.
Qalibafın son açıqlaması fonunda Tehranla Vaşinqton arasında qarşılıqlı təhdidlərin və gərginliyin daha da artacağı ilə bağlı narahatlıqlar yaranıb.
