OMM Redaksiyası
Rusiyada xarici internet mağazaları və elektron ticarət platformalarından alış-veriş edənlər üçün yeni vergi qaydalarının tətbiqi təklif olunur.
"Operativ Məlumat Mərkəzi-OMM" xəbər verir ki, Rusiya Maliyyə Nazirliyi transsərhəd elektron ticarət çərçivəsində alınan xarici mallara 22% əlavə dəyər vergisi (ƏDV) tətbiq etməyi təklif edib.
Təklifə əsasən, vergi birbaşa alıcı tərəfindən deyil, elektron ticarət platformaları tərəfindən vergi agenti qismində ödəniləcək. Nazirlik hesab edir ki, bu dəyişiklik xarici onlayn platformalarla Rusiyanın daxili bazarında fəaliyyət göstərən şirkətlər arasında rəqabət şərtlərinin bərabərləşdirilməsinə kömək edə bilər.
ƏDV birbaşa 22% olacaq
Qeyd olunur ki, əvvəlki variantda xaricdən alınan mallara tətbiq ediləcək ƏDV-nin mərhələli şəkildə artırılması nəzərdə tutulurdu. Yeni təşəbbüsdə isə birbaşa 22%-lik standart ƏDV dərəcəsinin tətbiqi təklif edilir.
Bununla yanaşı, Maliyyə Nazirliyi xaricdən poçt vasitəsilə göndərilən və şəxsi istifadə üçün nəzərdə tutulan, dəyəri 200 avroyadək olan bağlamalara 100 rubl gömrük rüsumu tətbiq etməyi də təklif edib.
Bu ödənişin 2027-ci ildən qüvvəyə minməsi nəzərdə tutulur.
Xarici platformalardan alış-veriş azala bilər
Ekspertlərin qiymətləndirməsinə görə, dəyişikliklərin əsas nəticələrindən biri xarici və yerli satıcılar arasında vergi yükünün yaxınlaşdırılması ola bilər.
Digər tərəfdən, xarici platformalardan sifarişlərə əlavə ödənişlərin tətbiqi bu cür alış-verişə olan tələbatın azalmasına da səbəb ola bilər.
