Türk Dövlətləri Təşkilatının (TDT) daxili işlər nazirlərinin Astanada baş tutan 3-cü görüşündə türk "şengen"in yaradılması müzakirə edilib.
“Operativ Məlumat Mərkəzi-OMM” "Hürriyet"ə istinadən xəbər verir ki, bunu Türkiyənin daxili işlər naziri Mustafa Çiftçi TDT daxili işlər nazirinin Astanada baş tutan 3-cü görüşü ilə bağlı jurnalistlərə açıqlamasında deyib.
Onun sözlərinə görə, Türk dövlətlərinin hava limanlarında Türk dövlətləri vətəndaşları üçün xüsusi pasport nəzarəti məntəqələrindən keçməsi ilə bağlı işlər davam edir.
"Avropa ölkələrindən birinə getdiyimiz zaman Avropa İttifaqı vətəndaşlarının bir nəzarət məntəqəsindən, digər ölkələrin vətəndaşlarının isə başqa nəzarət məntəqəsindən keçdiyini görürük. Bunun oxşarının Türk dövlətləri arasında da yaradılması istiqamətində işlərimiz davam edir", - deyə o vurğulayıb.
