OMM Redaksiyası
Qadın voleybolçulardan ibarət “Turan” komandası CEV Çempionlar Liqasının ikinci təsnifat mərhələsinin cavab oyununda Xorvatiyanın “Mladost” klubunu 3:2 hesabı ilə məğlub edib. Azərbaycan təmsilçisinin baş məşqçisi Ziya Rəcəbov matçın gözlədikləri kimi alınmadığını deyib.
Rəcəbov yol yorğunluğu, ölkələr arasındakı üç saatlıq fərq və hazırlıq üçün vaxtın az olmasının komandaya təsir etdiyini bildirib. Onun sözlərinə görə, “Mladost” uzun müddətdir birlikdə oynadığı üçün oyunçularının anlaşması daha yaxşı olub, “Turan”ın heyəti isə, demək olar ki, yenilənib. Baş məşqçi voleybolçularının təcrübəsini və meydançada xarakter göstərməsini vurğulayıb.
Rəcəbov rəqib komandanın onları təxribata çəkməyə çalışdığını söyləyib. O, “Mladost”un baş məşqçisi, italiyalı Rikkardo Boierinin məğlubiyyətlə barışmaq istəmədiyini və idmançıya yaraşmayan hərəkətlər etdiyini iddia edib. Baş məşqçi oyunçularına çəkdikləri əziyyətə görə təşəkkür edib, Azərbaycanın Xorvatiyadakı səfirliyinin də komandaya dəstək olduğunu qeyd edib.
“Turan” III təsnifat mərhələsində Bolqarıstanın “Maritsa” klubu ilə qarşılaşacaq. Rəcəbov rəqibin gənc kollektiv olduğunu və komandasının onu təhlil edəcəyini bildirib.
