OMM Redaksiyası
Azərbaycanın U-15 millisinin baş məşqçisi Famil Xəlilov FIFA U-15 dünya çempionatında komandanın çıxışından danışıb. O, daha yaxşı nəticəyə ümid etdiklərini, lakin ağır məğlubiyyətdən sonra futbolçuların psixoloji baxımdan toparlana bilmədiklərini bildirib.
“Onları oyuna kökləməyə çalışdıq, amma bəzi məqamlarda yenə boşluqlar hiss olunurdu. Məqsədimiz qrupda ən yaxşı nəticəni göstərərək daha güclü komandalarla oynamaq və futbolçuların çatışmazlıqlarını görmək idi”, – Xəlilov deyib.
Baş məşqçi futbolçuların istedadlı olduğunu vurğulayıb. Onun sözlərinə görə, 14-15 yaşlı oyunçular ilk dəfə belə turnirdə iştirak ediblər, bəziləri isə indiyədək ölkə xaricinə çıxmayıb. Xəlilov altı gün ərzində 10-cu oyuna çıxmağın onlar üçün ağır təzyiq yaratdığını qeyd edib.
Beynəlxalq təcrübəyə ehtiyac var
Xəlilov bildirib ki, Azərbaycan millisi Avstraliya, Haiti və Çili ilə oyunlarda yaxşı çıxış edib, lakin təcrübəsizlikdən yaranan boşluqlardan rəqiblər yararlanıblar. Futbolçuların inkişafı üçün daha çox beynəlxalq turnirdə və güclü rəqiblərlə oyunlarda iştirak etməsi, eləcə də klubların uşaqlar üçün daha çox turnir təşkil etməsi vacibdir.
Baş məşqçi AFFA rəhbərliyinin komandaya dəstək göstərdiyini deyib. O, çatışmazlıqlar üzərində işləyəcəklərini və futbolçuları növbəti U-17 Avropa çempionatının seçmə mərhələsinə hazırlamağa çalışacaqlarını bildirib.
Bakıda keçirilən turnirdə Azərbaycan millisi Əfqanıstana məğlub olaraq 84-cü yeri tutub. Dünya çempionatı bu gün Bakı Kristal Zalında final oyunu, mükafatlandırma və bağlanış mərasimi ilə başa çatacaq.
