OMM Redaksiyası
AnewZ-nin məlumatına görə, Ukraynanın cənubundakı Xerson vilayətinin Rusiya nəzarətində olan Oleşki şəhərində sakinlərin təxliyəsinə və humanitar yardımın çatdırılmasına başlanılıb. Ukraynanın yüksəkvəzifəli rəsmisi David Araxamiya cümə günü “Telegram”da altı günlük atəşkəsin qüvvədə olduğunu yazıb və əlavə məlumatın veriləcəyini bildirib.
Ukraynanın İnsan Hüquqları üzrə Ombudsmanı Dmitri Lubinets cümə günü, oktyabrın 30-da “X” hesabında şəhər sakinlərinin təxliyəsi üçün 750 nəfərlik 25 avtobusun hazırlandığını açıqlayıb. Hərəkət imkanları məhdud olan şəxslər üçün təcili tibbi yardım maşınları da hazırlanıb.
Lubinets bildirib ki, Oleşkidən çıxmaq istəyən bütün mülki şəxslərə təhlükəsiz şəkildə şəhəri tərk etmək imkanı veriləcək. Qalmağı seçən sakinlər isə zəruri humanitar yardım ala biləcəklər. O, hər iki tərəfin ABŞ-ın vasitəçiliyi ilə əldə olunmuş altı günlük atəşkəsə əməl etməsinin vacibliyini vurğulayıb.
“Əsas vəzifəmiz bu yardımın ehtiyacı olan hər bir insana çatmasını təmin etməkdir. Yaşlılara, əlilliyi olan şəxslərə, səhhətləri və ya digər hallarla əlaqədar özlərinə qulluq edə bilməyənlərə xüsusi diqqət yetirilir”, – Lubinets deyib.
Ombudsman missiyanın Rusiya İnsan Hüquqları üzrə Müvəkkili Yana Lantratova ilə birlikdə həyata keçirildiyini, hazırlıq işlərinin tamamlandığını və üç ölkədən jurnalistlərin missiyanı işıqlandırmaq üçün onlara qoşulduğunu bildirib. O, Lantratovaya əməkdaşlığa, ABŞ-ın birinci xanımı Melaniya Trampa isə vasitəçilik və koordinasiya səylərinə görə təşəkkür edib. Lubinets Ukrayna Silahlı Qüvvələrinə də xüsusi minnətdarlığını çatdırıb.
Oleşki Ukraynanın cənubundakı Xerson vilayətində cəbhə xəttində yerləşir. Şəhər 2022-ci ilin fevralında müharibənin ilk günlərində Rusiya qüvvələri tərəfindən ələ keçirilib. Müharibədən əvvəl burada təxminən 24 min nəfər yaşayırdı.
Ukrayna hakimiyyətinin məlumatına görə, hazırda şəhərdə təxminən 6 min nəfər, o cümlədən 200 uşaq qalır. Oleşkidə üç ildir elektrik enerjisi, qaz və su yoxdur, mağazalar da fəaliyyət göstərmir. Marşrutların minalanması və dron hücumları səbəbindən şəhərə giriş-çıxış xeyli çətinləşib.
“İzvestiya” qəzetinin cümə günü yaydığı məlumata görə, ərzaq və tibbi ləvazimat daşıyan humanitar yardım karvanı gecə saatlarında Oleşkiyə doğru hərəkətə başlayıb. Nəşr karvanı Fransa, İtaliya, Rusiya, Ukrayna və ABŞ-dan olan jurnalistlərin müşayiət etdiyini yazıb.
Cümə axşamı Rusiya və Ukrayna Oleşki ətrafında ərazilərin minalardan təmizlənməsinin başa çatdığını və sakinlərə yardım çatdırmaq, eləcə də bəzilərinin şəhərdən çıxmasına imkan vermək üçün əməliyyata başlamağa hazır olduqlarını bildiriblər. Lantratova şəhərdə minalardan təmizləmə işləri zamanı iki nəfərin öldüyünü deyib.
