Səudiyyə Ərəbistanı və Yəmən ABŞ-dən yardım istədi

Səudiyyə Ərəbistanı və Yəmən hökuməti husilərin yenidən fəallaşması fonunda ABŞ-dən yardım istəyib.

"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.

Bildirilib ki, Yəmən ABŞ-dən ölkənin silahlı qüvvələrinə və humanitar proqramlara dəstəyin bərpa edilməsini xahiş edib.

Diplomatın sözlərinə görə, Səudiyyə Ərəbistanı da Ağ Evin diqqətini bölgədəki vəziyyətə cəlb etməyə çalışır.

"Yəməndə strateji ərazilərin husilərin nəzarətində qalması ilə barışmaq Səudiyyə Ərəbistanı üçün davamlı milli təhlükəsizlik böhranını qəbul etmək deməkdir", - adı açıqlanmayan diplomat bildirib.

Bununla belə, o, ABŞ-nin böyük ehtimalla bölgədə aktiv hərbi addımlar atmaqdan çəkinəcəyini düşünür.

"Amerikalılar İran istisna olmaqla, regiondakı hər hansı münaqişəyə cəlb olunmaq istəmirlər. Halbuki bu, əslində ABŞ üçün strateji uğursuzluqdur", - mənbə əlavə edib.

Məlumat üçün bildirək ki, Yəməndə münaqişə 2014-cü ildə başlayıb. 2022-ci ildən etibarən ölkədə nisbi sakitlik hökm sürüb. Lakin 2026-cı ilin iyulunun əvvəlindən hökumət qüvvələri ilə husilər arasında ölkənin müxtəlif bölgələrində döyüşlər yenidən intensivləşib.