Azərbaycan boksçusu Səbuhi Əlizadə Xorvatiyanın Poreç şəhərində keçirilən U-23 Avropa çempionatına qələbə ilə başlayıb.
90 kq-dan yuxarı çəki dərəcəsində mübarizə aparan Əlizadə 1/8 finalda Ermənistan təmsilçisi İşxan Hovsepyanla üz-üzə gəlib. Döyüş zamanı üç xəbərdarlıq alan Hovsepyan diskvalifikasiya olunub və Azərbaycan boksçusu qalib elan edilib.
Əlizadə bununla səkkiz ən güclü boksçu sırasına yüksəlib. O, 1/4 finalda bolqarıstanlı Kiril Georgiyevlə qarşılaşacaq. Rəsmi yarış cədvəlinə əsasən, döyüş noyabrın 20-də keçiriləcək.
39 ölkədən 276 idmançının iştirak etdiyi çempionat noyabrın 24-də başa çatacaq. Azərbaycan millisi turnirdə yeddi boksçu ilə təmsil olunur.
Kontekst
Noyabrın 13-də yayılan məlumata görə, Azərbaycan millisi U-23 Avropa çempionatında yeddi boksçu ilə yarışacaqdı. Noyabrın 16-da isə turnirin püşkatmasında Azərbaycan təmsilçilərinin ilk rəqibləri müəyyənləşmişdi.