“Sabah”a qarşı üç qol vurması ilə yadda qalan 16 yaşlı Cey Cey Qabriel “Mançester Yunayted”dən ayrılıb. Gənc hücumçu sosial şəbəkə hesabında paylaşdığı vida videosunda klubla yollarını ayırdığını açıqlayıb.
Qabriel ona dəstək olan məşqçilərə, klub əməkdaşlarına və komanda yoldaşlarına təşəkkür edib. O bildirib ki, karyerasında yeni səhifə açsa da, “Mançester Yunayted” həmişə həyat hekayəsinin bir hissəsi olaraq qalacaq.
Futbolçu 2020-ci ildə klubun akademiyasına qoşulub. O, sentyabrda rəhbərliyə komandadan ayrılmaq istədiyini çatdırıb. “Mançester Yunayted” onu klubda saxlamağa çalışsa da, Qabriel qərarını dəyişməyib.
Hücumçunun karyerasını “Real Madrid”də davam etdirəcəyi gözlənilir. Madrid klubu transferdə əsas favorit hesab olunur, amma keçid hələ rəsmiləşməyib.
Qeyd edək ki, Qabriel sentyabrın 10-da UEFA Gənclər Liqasının ümumi mərhələsində “Sabah”a qarşı het-trik edib. “Mançester Yunayted”in U-19 komandası həmin görüşdə Azərbaycan təmsilçisinə 5:0 hesabı ilə qalib gəlib.