Rumıniya Prezidentindən ABŞ hərbçilərinin ölkədə yerləşdirilməsi ilə bağlı açıqlama

Rumıniya Prezidenti Nicuşor Dan ölkə ərazisində Amerika hərbi qüvvələrinin yerləşdirilməsində maraqlı olduğunu bildirib və bunun hər iki tərəf üçün sərfəli olacağını vurğulayıb.

“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.

"Biz Amerika əsgərlərini öz ərazimizdə görməyi çox istərdik. Bu, hər iki ölkə üçün çox sərfəli olardı, çünki biz Yaxın Şərqə və Aralıq dənizinə çox yaxın yerdə yerləşirik", - o qeyd edib.

Onun sözlərinə görə, ölkələr artıq hərbi sahədə əməkdaşlıq edirlər. Belə ki, Rumıniya hərbi bazaları əvvəllər Amerika təyyarələrinin yanacaq doldurması və hərbi texnikanın yerləşdirilməsi üçün istifadə olunub, lakin prezident bu tərəfdaşlığın daha da inkişaf etdirilə biləcəyinə inanır.

"Biz istəyirik ki, daha çox Amerika şirkəti Rumıniyaya sərmayə yatırsın. Bizdə bunun üçün şərait, elm və texnika sahəsində təhsilli insanlar var, həmçinin energetika sektorunda yaxşı potensialımız mövcuddur", - Prezident əlavə edib.

Qeyd edək ki, hazırda Rumıniyada NATO-ya üzv ölkələrdən 5,5 mindən çox hərbi qulluqçu yerləşdirilib ki, onların da təqribən 1,5 mini amerikalı əsgərlərdir.