Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva noyabrın 16-da Bakının Suraxanı rayonunda Qaraçuxur İdman Zalının açılışında iştirak edib.
Gənclər və idman naziri Fərid Qayıbov Leyla Əliyevaya idman zalında yaradılan şərait barədə məlumat verib.
İdman zalının tikintisinə Azərbaycan Respublikası Prezidentinin müvafiq sərəncamı ilə təsdiqlənən “Bakı şəhərinin və onun qəsəbələrinin sosial-iqtisadi inkişafına dair Dövlət Proqramı” əsasında başlanılıb.
Ümumi sahəsi 1115 kvadratmetr olan ikimərtəbəli binada universal idman, aerobika və rəqs, eləcə də trenajor zalları yaradılıb. Burada gimnastika, güləş, taekvondo, karate, cüdo, badminton, voleybol və basketbol üzrə məşqlər və yarışlar təşkil etmək mümkün olacaq.
Kompleksin ərazisində açıq hava idman meydançası, uşaqlar üçün minifutbol meydançası və yer tipli şahmat sahəsi də inşa edilib. İdman zalında məşqçilər və idmançılar üçün zəruri şərait yaradılıb.