OMM Redaksiyası
“Şamaxı”nın qapıçısı Rikardo Fernandeş Misli Premyer Liqasının ilk dövrəsində komandanın çıxışını şərh edib. Portuqaliyalı futbolçu bu mərhələni uğurlu saymağın mümkün olduğunu, bununla belə, daha çox xal toplamaq istədiklərini deyib.
“Digər komandalarla müqayisədə, xüsusilə maliyyə baxımından imkanlarımızın məhdud olduğunu bilirik. Buna baxmayaraq, əlimizdə olan imkanlarla mübarizə aparırıq və daha artığına nail olmağı hədəfləməliyik”, – Fernandeş Sport24.az-a açıqlamasında söyləyib.
Qapıçı bildirib ki, indi itirilən xallara görə təəssüflənməkdənsə, səhvləri və yaxşılaşdırılmalı məqamları müəyyənləşdirmək vacibdir. Komanda səhvləri minimuma endirməyə, hər gün və hər oyunda inkişaf etməyə çalışmalıdır.
Fernandeşin sözlərinə görə, “Şamaxı”nın turnir cədvəlindəki mövqeyindən razı və ya narazı qalmaq barədə qərarı yalnız mövsümün sonunda vermək olar. Çempionatın cəmi üçdə birinin geridə qaldığını vurğulayan qapıçı qarşıda mübarizə aparmaq üçün hələ çox xal olduğunu qeyd edib.
“Şamaxı” Misli Premyer Liqasında 11 turdan sonra 14 xalla yeddinci pillədə qərarlaşıb.
