OMM Redaksiyası
Azərbaycanın qadın basketbol millisi qrup mərhələsində İrlandiyaya 73:91 hesabı ilə uduzub. Baş məşqçi İoannis Diamantakos görüşdən sonra komandanın müdafiədə zəif oynadığını və istədiyi səviyyəyə çata bilmədiyini deyib.
“Təəssüf ki, müdafiədə çox zəif çıxış etdik və istədiyimiz səviyyədə oynaya bilmədik. Oyunun yekun nəticəsində yaranan fərq məhz bu amillərlə bağlıdır. İlk növbədə, nəzərə almaq lazımdır ki, üç gün ərzində keçirdiyimiz ikinci qarşılaşma idi. Yorğunluq da hiss olunurdu”, – yunanıstanlı mütəxəssis bildirib.
Diamantakos komandanın beynəlxalq səviyyədə təcrübə çatışmazlığını da qeyd edib. Onun fikrincə, zamanla bu problemləri aradan qaldırmaq mümkün olacaq. Hazırda isə bütün diqqət İslandiyaya qarşı oyuna yönəlib.
Azərbaycan millisi qrupdakı ilk görüşündə İsveçrəyə 33:84 hesabı ilə məğlub olmuşdu. Komandanın növbəti qarşılaşması noyabrın 17-də səfərdə İslandiyaya qarşı keçiriləcək. Hafnarfjörður şəhərindəki oyun Bakı vaxtı ilə saat 23:30-da başlayacaq.
