Afət Ziyadqızı
Qəzza zolağında dağıntılar altından daha 17 fələstinlinin cəsədi çıxarılıb.
“Operativ Məlumat Mərkəzi-OMM” xəbər verir ki, Qəzza Mülki Müdafiə Baş İdarəsinin açıqlamasına görə, “Şəhid cənazələrinin xilas edilməsi” layihəsinin ikinci mərhələsi davam edir.
Bildirilib ki, layihənin ikinci mərhələsi Qəzza şəhərində və Nuseyrat qaçqın düşərgəsində həyata keçirilir.
Qəzza şəhərinin Zeytun və Yərmuk məhəllələrində Hacci və Nədim ailələrinə məxsus evlərin dağıntıları altından itkin düşmüş 16 nəfərin cəsədinə çatılıb.
Nuseyrat düşərgəsində isə Əl-Vərr ailəsinə məxsus evin dağıntıları altından daha bir nəfərin cəsədi çıxarılıb.
Beləliklə, layihə çərçivəsində dağıdılmış evlərin dağıntıları altından itkin hesab edilən daha 17 fələstinlinin cəsədi tapılıb.
Qeyd olunub ki, axtarış-xilasetmə işləri ağır şəraitdə aparılır. 10 oktyabr 2025-ci ildə əldə olunan atəşkəs razılaşmasına baxmayaraq, zəruri ağır texnika və avadanlıqların bölgəyə girişinə icazə verilmədiyi üçün dağıntılar altındakı cəsədlərin çıxarılması prosesi olduqca çətin və ləng gedir.
Qəzza Mülki Müdafiə Baş İdarəsi layihənin ikinci mərhələsinə iyulun 19-da başlayıb. Bu mərhələdə Qəzzanın şimal və mərkəzi hissələrində, eləcə də Qəzza şəhərində 147 dağıdılmış binanın dağıntılarında axtarış aparılması planlaşdırılır.
Təxminən 800 saatlıq iş nəzərdə tutulan ikinci mərhələdə dağıntılar altında olduğu ehtimal edilən 1072 nəfərin cəsədinin tapılması hədəflənir.
Layihənin 2025-ci ilin noyabr ayının sonunda başa çatan birinci mərhələsində 54 ev və binanın dağıntıları altında 500 saatlıq axtarış işi aparılıb. İtkin hesab edilən 559 nəfərdən 333-nün cəsədi və cəsəd qalıqları çıxarılıb.
Qəzzadakı hökumət qurumları və fələstinli qrupların məlumatına görə, atəşkəs razılaşmasının birinci mərhələsində İsrailin zəruri ağır texnika və avadanlıqların bölgəyə girişinə icazə verməsi nəzərdə tutulsa da, bu öhdəlik yerinə yetirilməyib.
İsrailin Qəzza zolağına təxminən iki il davam edən hücumları nəticəsində 73 mindən çox fələstinli həlak olub, 174 mindən çox insan yaralanıb. Mülki infrastrukturun təxminən 90 faizi zərər görüb.
Birləşmiş Millətlər Təşkilatının hesablamalarına görə, Qəzzanın yenidən qurulması üçün təxminən 70 milyard dollar vəsait tələb olunur.
