OMM Redaksiyası
Ukraynanın Rusiyanın cənubundakı Novorossiysk liman şəhərinə gecə saatlarında endirdiyi zərbələr nəticəsində 4 nəfər ölüb, 29 nəfər yaralanıb. Krasnodar vilayətinin qubernatoru Veniamin Kondratyev bildirib ki, ölənlər arasında bir uşaq da var.
Onun sözlərinə görə, hücumlar zamanı beş yaşayış binasına, kilsəyə və uşaq bağçasına ziyan dəyib. Yaralılar tibbi yardım alırlar.
Novorossiyskdə hərbi obyektlərə zərbə
Ukraynanın pilotsuz uçuş aparatları qüvvələrinin komandanı Robert Brovdi Telegram-da yazıb ki, Novorossiyskdəki Rusiya hərbi-dəniz bazasına hücum zamanı hərbi gəmilər məhv edilib. O, raketdaşıyan gəmilərin də zərər görən və ya itirilən gəmilər arasında olduğunu bildirib, lakin onların sayını açıqlamayıb.
Ukrayna Prezidenti Volodimir Zelenski “X” sosial şəbəkəsində hücumu təsdiqləyərək, zərbələrin neft yükləmə terminalına, hərbi liman obyektlərinə və “Kalibr” raketləri daşıyan hərbi gəmilərə endirildiyini deyib.
Rusiya Ukrayna ərazisinə zərbələr endirib
Ukrayna rəsmilərinin məlumatına görə, Rusiya qüvvələrinin gecə hücumları nəticəsində Ukrayna-Moldova sərhədindəki keçid məntəqəsində 2 nəfər ölüb, 3 nəfər yaralanıb. Daha 16 nəfərin təhlükəsiz əraziyə təxliyə edildiyi bildirilib. Starokozache yaxınlığındakı keçid hücumdan sonra bağlanıb.
Nikolayev şəhərində liman, nəqliyyat və mülki infrastruktura ziyan dəyib, bir nəfər ölüb, bir neçə nəfər yaralanıb. Kiyevin bir neçə rayonuna endirilən zərbələrdən sonra yanğınlar baş verib, lakin itki qeydə alınmayıb.
Dnepr şəhərində isə Rusiya zərbələri nəticəsində 51 yaşlı kişi və 52 yaşlı qadın xəstəxanaya yerləşdirilib. Xersonda yaşayış binasına pilotsuz uçuş aparatının dəyməsi nəticəsində 70 yaşlı qadın ölüb, Xarkov vilayətinin Zoloçiv kəndində isə 3 nəfər yaralanıb.
Diplomatik və beynəlxalq reaksiyalar
Rusiya Müdafiə Nazirliyi Ukrayna-Moldova sərhədindəki Starokazache keçid məntəqəsinə zərbə endirildiyini təsdiqləyib. Nazirlik keçiddən Rumıniyadan Moldova üzərindən Ukraynaya hərbi yüklərin daşınması üçün istifadə edildiyini iddia edib.
Rusiya tərəfi Qara dənizdə Odessa limanına doğru hərəkət edən hərbi texnika daşıyan Ukrayna yük gəmisinin və Kiyevdə pilotsuz uçuş aparatları istehsal edən şirkətə məxsus anbarın vurulduğunu açıqlayıb. Bu məlumatı Ukrayna təsdiqləməyib və iddiaları müstəqil şəkildə yoxlamaq mümkün olmayıb.
ABŞ dövlət katibi Marko Rubio yaxın həftələrdə Rusiya-Ukrayna sülh danışıqlarının bərpası üçün fəaliyyət planının hazırlanmasının mümkün olduğunu deyib.
Avropa İttifaqı Məhkəməsi rusiyalı milyarder Roman Abramoviçin ona tətbiq olunan sanksiyaların ləğvi ilə bağlı şikayətini təmin etməyib. Məhkəmə, həmçinin dondurulmuş Rusiya aktivlərindən əldə olunan gəlirlərin Ukraynanın dəstəklənməsinə yönəldilməsi ilə bağlı Macarıstanın etirazını rədd edib.
