OMM Redaksiyası
“Qarabağ”ın braziliyalı müdafiəçisi Mateuş Silva Azərbaycan Premyer Liqasının 10-cu turunda “Qəbələ” ilə 0:0 hesablı heç-heçəni dəyərləndirib. O, qarşılaşmada oyun quruculuğu və hücumların təşkilində çətinlik çəkdiklərini bildirib.
“Meydanda çətinliklərlə üzləşdik. Bu oyundan nəticə çıxarmalı, səhvlərimizi təhlil etməli və növbəti qarşılaşmaya köklənməliyik. Bu dəfə bir xalla kifayətlənirik. Azarkeşlərə dəstəklərinə görə təşəkkür edirəm”, – deyə 29 yaşlı futbolçu teleqraf.az-a açıqlamasında vurğulayıb.
Silva uyğunlaşma dövründən danışıb
Futbolçu komandanın cari mövsümdə əvvəlki illərlə müqayisədə zəif çıxış etməsi və qol vurmaqda çətinlik çəkməsi barədə də danışıb. Onun sözlərinə görə, heyətdən ayrılan və komandaya qoşulan futbolçuların olması normal prosesdir, hazırda “Qarabağ” da uyğunlaşma dövrü keçir.
Silva bütün futbolçuların məşqlərdə səylə çalışdığını və əvvəlki oyun səviyyəsinə qayıtmaq üçün əllərindən gələni etdiklərini deyib. O, zamanla hər şeyin qaydasına düşəcəyinə inandığını bildirib.
Braziliyalı müdafiəçi qarşıdakı oyunların asan keçməyəcəyini, milli fasilənin isə komanda yoldaşlarının bir-birini daha yaxşı tanımasına kömək etdiyini qeyd edib. Silva hər matça hazırlaşmağın vacibliyini vurğulayıb.
Hazırda 19 xalı olan “Qarabağ” turnir cədvəlinin üçüncü pilləsindədir və lider “Neftçi”dən 2 xal geri qalır.
Kontekst
Oktyabrın 5-də Mateuş Silva “Qarabağ”ın əvvəlki oyun səviyyəsinə qayıdacağına inandığını bildirmiş, avrokuboklardan kənarda qalmağın futbolçulara təsir etdiyini və milli fasilənin komandaya uyğun vaxta düşdüyünü demişdi.
