Afət Ziyadqızı
ABŞ Prezidenti Donald Tramp noyabrın 3-də keçiriləcək Konqresə aralıq seçkiləri ərəfəsində Ayova və Kanzas ştatlarında keçirilən seçki mitinqlərində çıxış edərək xarici siyasət və administrasiya daxilindəki münasibətlərlə bağlı diqqətçəkən bəyanatlar verib.
"Operativ Məlumat Mərkəzi-OMM" xəbər verir ki, Ayovadakı mitinqdə Tehranla mövcud gərginliyə toxunan Tramp İranla bağlı məsələni hələ yekunlaşdırmamasının yeganə səbəbinin "yaxşı insan olmaq istəyi" ilə əlaqələndirib.
"Oradakı insanların həyatını xilas etməyə çalışıram. Ancaq bir mərhələdə onları çəkiclə vurmalı olacağıq", – deyə ABŞ dövlət başçısı vurğulayıb. Tramp, həmçinin İranın hərbi təyyarə və gəmilərinin əksəriyyətinin artıq məhv edildiyini iddia edib.
Pekinlə münasibətlərə də dəyən Tramp: “Bəzi insanlar ”Çin bizi izləyir" deyirlər. Mən də “Bəli, biz də onları izləyirik” dedim", – ifadələrini işlədib.
Kanzas ştatındakı çıxışında isə Donald Tramp ABŞ-nin dövlət katibi Marko Rubionun ictimaiyyət arasında getdikcə artan nüfuzuna toxunub. Administrasiya rəhbəri bu vəziyyətdən zarafatla narazılığını bildirib.
Dövlət katibinin reytinqinin yüksəlməsinə ironiya ilə yanaşan Tramp: "Daha da populyarlaşsa, 'İşdən çıxarıldın!' deyəcəyəm", – deyərək tərəfdarlarını güldürüb.
