Afət Ziyadqızı
Birləşmiş Ştatlar Böyük Britaniyada dislokasiya olunmuş strateji bombardmançı təyyarələrini gözlənilmədən geri çağıraraq birbaşa ABŞ ərazisinə qaytarıb. ABŞ rəsmiləri təyyarələrin Yaxın Şərq və ya Avropadakı digər bazalara köçürülmədən birbaşa ölkəyə aparılmasını qeyri-adi və mühüm hərbi-strateji addım kimi dəyərləndiriblər.
"Operativ Məlumat Mərkəzi-OMM" xəbər verir ki, bu qərar hərbi bazanı hədəf alan və İranla əlaqələndirilən sui-qəsd cəhdi üzrə aparılan genişmiqyaslı istintaq fonunda qəbul edilib.
Sentyabrın 27-də baza yaxınlığında terror şübhəsi ilə 23-25 yaşlarında beş Britaniya vətəndaşı saxlanılıb. Onların avtomobilində partlayıcı maddə tapılmadığı üçün zaminə buraxılmaları ABŞ Prezidenti Donald Tramp tərəfindən kəskin tənqid olunub. Bununla belə, istintaq çərçivəsində Böyük Britaniya və İran ikili vətəndaşlığı olan 25 yaşlı daha bir şəxs həbs edilib.
Olayla bağlı rəsmi London və Vaşinqton Tehranı ittiham edib. Britaniyanın Baş naziri Endi Börnham insidentin arxasında İran xüsusi xidmət orqanlarının durduğuna dair ciddi sübutların olduğunu bildirib. ABŞ dövlət katibi Marko Rubio da prosesə xarici dövlət aktorunun müdaxilə etdiyini diqqətə çatdıraraq İranın qlobal miqyasda ABŞ maraqlarını hədəf almaq cəhdlərindən narahatlığını ifadə edib.
Öz növbəsində İran Xarici İşlər Nazirliyi ittihamları tamamilə əsassız adlandıraraq rədd edib. Tehran rəhbərliyi Böyük Britaniyanın İrandakı səfirini XİN-ə çağıraraq Londonun rəsmi mövqeyinə qəti protestini bildirib.
