OMM Redaksiyası
"Çelsi" klubunun sol cinah müdafiəçisi Mark Kukurelya bu yay transfer bazarının diqqət mərkəzində olan oyunçulardan biridir. 27 yaşlı ispaniyalı futbolçu ilə bir sıra nüfuzlu klublar, o cümlədən "Barcelona", "Atletico Madrid" və "Manchester City" maraqlanır.
"Operativ Məlumat Mərkəzi-OMM" xarici KİV-ə istinadən xəbər verir ki, futbolçu karyerasını davam etdirmək üçün ən çox "Barcelona"ya üstünlük verir.
İspaniyalı müdafiəçi Kataloniya təmsilçisindən rəsmi və konkret təklif gələcəyi təqdirdə, məhz bu klubu seçməyə hazırdır.
Hazırda oyunçunun transfer dəyərinin 40-50 milyon avro civarında olduğu qiymətləndirilir.
Buna baxmayaraq, "Barcelona" rəhbərliyi hələlik vəziyyəti izləməklə kifayətlənir. Klubun öz yetirməsi olan Kukurelya ilə bağlı hələlik rəsmi danışıqlara başlamaq planlaşdırılmır.
Qeyd edək ki, başa çatan mövsümdə Kukurelya "Çelsi"nin heyətində ümumilikdə 50 matça çıxıb, 1 qol vurub və 4 məhsuldar ötürmə ilə yadda qalıb.
