Rusiyanın Xarici İşlər Nazirliyinin sözçüsü Mariya Zaxarova onun və ailə üzvlərinin ABŞ vətəndaşlığına malik olması ilə bağlı yayılan iddiaları təkzib edib.
“Operativ Məlumat Mərkəzi-OMM” xəbər verir ki, diplomat bu barədə “Sputnik Radio”da çıxışı zamanı danışıb.
Zaxarova bildirib: “Mənim nə başqasının, nə ərimin, nə qızımın, nə anamın, nə də atamın ABŞ vətəndaşlığı yoxdur və heç vaxt olmayıb”.
Onun sözlərinə görə, bu cür şayiələr o, Rusiya Xarici İşlər Nazirliyində departament və mətbuat direktoru vəzifəsinə təyin olunduqdan dərhal sonra yayılmağa başlayıb.
Diplomat vurğulayıb ki, sözügedən iddialar heç bir faktla təsdiqlənmir və hələ 2020-ci ildə rəsmi şəkildə təkzib edilib. Buna baxmayaraq, son illərdə bu mövzuda yanlış məlumatların yayılması davam edir.
Zaxarova əlavə edib ki, bu cür xəbərlər məqsədli şəkildə dezinformasiya xarakteri daşıyır və ictimai rəyi çaşdırmağa yönəlib.
