OMM Redaksiyası
Azərbaycan millisinin hücumçusu Mahir Emrelinin UEFA Millətlər Liqasının Litva ilə oyununda vurduğu qol Xorvatiya və Polşa mediasında işıqlandırılıb.
Xorvatiyanın “Index” nəşri Emrelini Zaqreb “Dinamo”sunun sabiq futbolçusu kimi təqdim edib. Nəşr yazıb ki, “Rakuv”un hücumçusu 14-cü dəqiqədə yaranmış imkandan istifadə edərək hesabı 1:1-ə çatdırıb.
“Index” qol sevincinə də diqqət yetirib. Emreli 27 sentyabrda – 2020-ci ildə Ermənistanla 44 günlük müharibədə həlak olanların xatirəsinə qeyd edilən Anım Günündə fərqləndiyi üçün qolu hərbi salamla qeyd edib.
Məqalədə 2022-2024-cü illərdə “Dinamo”nun formasını geyinən hücumçunun Xorvatiya klubunda ölkə çempionluğu və kubok qazandığı da xatırladılıb.
Polşanın “WP” nəşri isə Emrelinin Tacikistanla yoxlama oyununda aldığı zədənin ciddi olmadığını və onun Litvaya qarşı start heyətində meydana çıxdığını qeyd edib. Nəşr Kaunasdakı görüşdə Polşa futboluna yaxşı tanış olan Rahil Məmmədov və Renat Dadaşovun da oynadığını vurğulayıb.
Litva – Azərbaycan qarşılaşması 1:1 hesabı ilə başa çatıb.
