OMM Redaksiyası
Monteneqronun Budva şəhərində boks üzrə U-17 Avropa çempionatının 1/4 final mərhələsi başa çatıb. Azərbaycan millisinin daha altı üzvü yarımfinala yüksəlib və bununla bu mərhələyə adlayan boksçularımızın sayı səkkizə çatıb.
Cəmilə Muradlı (57 kq) çexiyalı Rozali Uhrovanı 4:1 hesabı ilə məğlub edib. O, yarımfinalda italiyalı Morena Stifani ilə qarşılaşacaq. Həsrət Məmmədov (46 kq) slovakiyalı Kristian Mezesə cəmi 79 saniyəyə qalib gəlib. Onun növbəti rəqibi irlandiyalı Ronan Çarlz olacaq.
İsmayıl Nəsirzadə (52 kq) israilli Qleb Qrinblatı 5:0 hesabı ilə üstələyib və yarımfinalda irlandiyalı Martin Nevi ilə görüşəcək. Qardaş Rəhimov (54 kq) belaruslu Mikita Beskaravainy üzərində 5:0 hesablı qələbə qazanıb. O, monteneqrolu Strahinya Mrdakla qarşılaşacaq.
Məhəmmədəli İstamov (57 kq) yunanıstanlı Eleftherios Zurnatsisə qalib gəlib. İlk iki raunddan sonra rəqibin məşqçisi döyüşü dayandırıb. İstamovun yarımfinaldakı rəqibi ukraynalı Nikita Zaxarçenko olacaq. Hidayət Məmmədov (70 kq) isə rusiyalı Sandro Tsimtsbanı ilk raundda nokauta salıb. O, irlandiyalı Paddi Nevinlə döyüşəcək.
Yarımfinala daha əvvəl Səma Abbasova (66 kq) və Xumar Cəfərli (+80 kq) yüksəlib. Bu mərhələnin döyüşləri bu gün, final qarşılaşmaları isə oktyabrın 11-də keçiriləcək.
Kontekst
Xatırladaq ki, oktyabrın 7-də Azərbaycan millisinin daha beş boksçusu U-17 Avropa çempionatında 1/4 finala yüksəlmişdi.
