Madaqaskarda hökumət əleyhinə çıxışlar təşkil edən "Z Nəsli" hərəkatı respublika prezidenti Andri Radzuelinaya ultimatum verib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Bildirilib ki, müxalifətçilər prezidentə 48 saat ərzində tələblərini yerinə yetirməyi istəyiblər, əks halda ümummilli siyasi tətilə başlayacaqlarını qeyd ediblər.
Hərəkat prezidentin 6 oktyabrda yeni baş nazir Rüfen Zafisambunun təyin olunmasını və milli birlik hökumətinin formalaşdırılmasına başlanmasını diqqəti yayındırmaq üçün atılmış addım kimi qiymətləndirib.
Müxalifət prezidentin istefasını, hakimiyyətin siyasətinin əsaslı şəkildə yenidən nəzərdən keçirilməsini, su və elektrik təchizatı sahəsində qayda-qanun yaradılmasını tələb edir.
Qeyd olunub ki, Antananarivoda etirazçılar yenidən küçələrə çıxıblar, hüquq-mühafizə orqanları şəhər mərkəzinə gedən yolları bağlayıb, nəticədə şəhərdə hərəkət iflic olub.
