Afət Ziyadqızı
Avstraliya hökuməti ölkədə yayılan H5N1 quş qripi virusuna qarşı mübarizə tədbirlərini gücləndirir.
“Operativ Məlumat Mərkəzi – OMM” xəbər verir ki, rəsmi məlumatlara görə, ölkə ərazisində qeydə alınan yoluxma hallarının sayı artıq 230-u ötüb.
Məlumata görə, hökumət təbii mühitindən kənarda saxlanılan və nəsli kəsilmək təhlükəsi ilə üzləşən yerli quş növlərinin H5N1 virusuna qarşı peyvəndlənməsinə qərar verib.
Peyvəndləmə proqramının yaxın günlərdə ştatlar və regionlar üzrə həyata keçirilməsinə başlanacağı gözlənilir. Vaksinasiya seçmə xarakter daşıyacaq və quş növləri virusa qarşı həssaslığı və peyvənddən qorunma ehtimalı nəzərə alınmaqla müəyyən ediləcək.
Ətraf Mühit naziri Mürrey Vatt bildirib ki, əsas diqqət insan himayəsində olan quşlara yönəldiləcək. Nazir qeyd edib ki, vaksinin iki doza tələb etməsi səbəbindən vəhşi təbiətdə yaşayan quşların genişmiqyaslı peyvəndlənməsi hazırkı şəraitdə mümkün deyil.
Kənd Təsərrüfatı, Meşəçilik və Balıqçılıq naziri Culi Kollinz isə bildirib ki, virusun vəhşi quşlar arasında yayılmasının qarşısını tamamilə almaq mümkün olmasa da, yüksək risk altında olan növlərin qorunması üçün tədbirlər görülə bilər.
Nazirin sözlərinə görə, peyvəndləmə bu müdafiə strategiyasının əsas istiqamətlərindən birinə çevrilib.
