OMM Redaksiyası
İki çəki dərəcəsində UFC-nin keçmiş çempionu İliya Topuriya rusiyalı döyüşçü, PFL çempionu Usman Nurmaqomedovun Əbu-Dabidə Merab Dvalişvili ilə münaqişədən sonra saxlanıldığını iddia edib.
Əvvəlcə Nurmaqomedovun və onu müşayiət edən şəxslərin Əbu-Dabidəki hotellərdən birində Dvalişvili ilə dava etdiyi barədə məlumat yayılıb. Topuriya insidentin videosunu paylaşıb, daha sonra isə yeni açıqlama verib.
“Məlumatlara görə, Usman onunla olan qorxaqlarla birlikdə saxlanılıb. Elə bu adamlar təvazökarlıq və hörmət barədə danışmağa cəsarət edirlər? Nə biabırçılıq. Əsl qorxaqlardan ibarət bir dəstə. Mən sizi həmişə ortabablar dəstəsi hesab etmişəm. İndi son şübhələri də aradan qaldırdınız. Şərəf, hörmət və təvazökarlıq sadəcə deyilən sözlər deyil. Bunlar insanın yaşadığı dəyərlərdir. Siz isə bunların heç birini nümayiş etdirmədiniz”, – Topuriya sosial şəbəkədə yazıb.
