OMM Redaksiyası
Portuqaliya yığmasının baş məşqçisi Jorje Jezuş Kriştiano Ronalduya həsr olunması planlaşdırılan aksiya ilə bağlı danışıb. O, tədbirin məşqçilər heyətinin təşəbbüsü olmadığını, qərarın Portuqaliya Futbol Federasiyasına aid olduğunu bildirib.
Millətlər Liqasının qrup mərhələsinin 5-ci turunda Portuqaliya Danimarkanı qəbul edəcək. Qarşılaşma noyabrın 14-də Braqadakı “Munitsipal di Braqa” stadionunda keçiriləcək. Baş hakim Sloveniyadan olan Rade Obrenoviç olacaq. Oyunun Bakı vaxtı ilə saat 23:45-də başlanması nəzərdə tutulub.
Əvvəlcədən yayılan məlumata görə, Portuqaliya futbolçuları meydana Ronaldunun yığmada çıxış etdiyi 7 nömrəli formalarla çıxacaqlar.
“Bu, əlbəttə, məşqçilər heyətindən gəlməyib. Belə qərarlar həmişə Portuqaliya Futbol Federasiyasına, konkret olaraq futbol departamentinə və onun prezidentinə aiddir. Bu, gözəl ideyadır. Kriştianunun yığmada keçirdiyi 23 ili, nailiyyətlərini və müxtəlif klublarda çıxış edərək dünya futboluna göstərdiyi təsiri nəzərə almamaq olmaz”, – Jezuş bildirib.
O, Ronaldu ilə bir həftə deyil, bütöv bir il işlədiyini və futbolçunun dünyanın müxtəlif yerlərindəki gənc oyunçular üçün nə qədər önəmli olduğunu bildiyini deyib. Jezuş bu təşəbbüsü Portuqaliya futbolunun əfsanəsini unutmamaq üçün gözəl vasitə adlandırıb. Onun sözlərini Record yayıb.
