OMM Redaksiyası
“Barselona”nın və Fransa millisinin sabiq mərkəz müdafiəçisi Jeremi Matye peşəkar karyerasını bitirdikdən sonrakı dövr barədə danışıb. Onun sözlərini “So Foot” nəşri yayıb.
Matye bildirib ki, “Sportinq”də aldığı çarpaz bağ zədəsindən sonra vəziyyət çətinləşib. O, 2020-ci ildə karyerasını başa vurub. Zədədən sonra dizlik taxdığını və çox şey edə bilmədiyini deyən sabiq futbolçu depressiya yaşadığını, meydança, paltardəyişmə otağı və futbolçu olduğu dövrdə yaşadıqları üçün darıxdığını söyləyib.
Matyenin sözlərinə görə, karyerasını bitirdikdən sonrakı həyata hazırlaşmağa vaxtı olmayıb, çünki daha iki il oynayacağını düşünürdü. O, zədənin nəticələrini qəbul etməyin psixoloji baxımdan çətin olduğunu vurğulayıb. Matye daha əvvəl “Tuluza”da da çarpaz bağ zədəsi alıb və doqquz ay meydanlardan kənarda qalıb. Həmin vaxt məşqlərə getmək həvəsinin bəzən azaldığını, sadəcə oynamaq istədiyini deyən müdafiəçi karyerasını qəfil bitirmək qərarına gəlib.
Matye qərarına görə peşman olmadığını bildirib. Onun sözlərinə görə, 36 yaşı var idi və yaxşı karyera qurmuşdu. O, oynamağa davam etmək istəsə də, ailəsi ilə daha çox vaxt keçirməyi də düşünürdü.
