OMM Redaksiyası
AnewZ-in məlumatına görə, İsveçrə rəsmiləri cümə axşamı Nigeriyada on ildən çox müddətdə qeydə alınan ilk Ebola halının Uqandaya səfərlə əlaqəli ola biləcəyini bildiriblər. Bununla belə, yoluxma mənbəyi hələ aydın deyil. Uqanda ölkədə Ebola halının olmadığını deyir.
Xəstə Nigeriyada, Abucada yaşayan isveçrəli diplomatın Uqandada doğulmuş həyat yoldaşıdır. İsveçrənin Federal Xarici İşlər Departamentinin “Reuters”ə verdiyi açıqlamaya əsasən, qadında simptomlar yarandıqdan sonra Nigeriyanın paytaxtındakı özəl klinikada təxminən bir həftə qalıb. Rəsmilər onun virusa təxminən iki həftə əvvəl Uqandaya səfəri zamanı yoluxduğunu ehtimal edirlər.
Açıqlamada qeyd olunub ki, onunla birlikdə səfər edən həyat yoldaşı təcrid olunub, lakin onda simptomlar müşahidə edilməyib.
Nigeriya bu yoluxma halını çərşənbə axşamı təsdiqləyib. Beləliklə, ölkə epidemiyadan təsirlənən Afrikada dördüncü, dünyada isə beşinci ölkə olub. İyunda Fransada da başqa ölkədən gətirilmiş yoluxma qeydə alınmışdı. Nigeriya epidemiyanın yayıldığı ölkələr arasında əhalisi ən çox olanıdır.
Epidemiya mayın ortalarında elan edildiyi Konqo Demokratik Respublikasında başlayıb. Ümumdünya Səhiyyə Təşkilatı (ÜST) onu indiyədək qeydə alınmış ən sürətlə yayılan Ebola epidemiyası kimi xarakterizə edib.
Səfər marşrutu ilə bağlı fərqli məlumatlar
Uqanda rəsmiləri qadının Uqandadan əvvəl Konqonun şərqinə getdiyini bildirirlər. Hökumət sözçüsü Alan Kasujja “Reuters”ə deyib ki, Uqandada Ebola halı yoxdur.
“Əgər belə hal olsaydı, əvvəlki dəfələrdə olduğu kimi, bunu ilk biz açıqlayardıq”, – Kasujja bildirib.
ÜST avqustda Uqandanı Ebola virusundan azad ölkə elan etmişdi. Ölkədə may və iyun aylarında 20 yoluxma qeydə alınmış, onların əksəriyyətinin Konqodan gətirildiyi bildirilmişdi.
Bununla belə, həm ÜST, həm də Afrika Xəstəliklərə Nəzarət və Profilaktika Mərkəzləri (Africa CDC) qadının Konqoya səfər etdiyini təsdiqləyən sübut almadıqlarını deyirlər.
Africa CDC rəsmisi Vessam Mankoula bildirib ki, Nigeriya və Uqanda qadının hərəkət marşrutunu izləmək və virusla harada təmasda ola biləcəyini müəyyənləşdirmək üçün məlumat mübadiləsi aparırlar.
ÜST-nin Nigeriyadakı nümayəndəsi Pavel Ursunun sözlərinə görə, mövcud məlumatlar qadının sentyabrın 16-dan Uqandada olduğunu və oktyabrın 3-də Abucaya qayıtdığını göstərir.
ÜST-nin məlumatına görə, qadında oktyabrın 7-də, Nigeriyaya qayıtdıqdan dörd gün sonra simptomlar yaranıb. O, oktyabrın 11-də Abucadakı özəl tibb müəssisəsinə müraciət edib, laboratoriya analizləri isə oktyabrın 20-də Ebola virusunu təsdiqləyib.
Nigeriya rəsmiləri xəstə ilə təmasda olmuş 44 nəfəri müəyyənləşdirib və onların hamısını müşahidə altında saxlayırlar.
Ursu xəstənin hələ də xəstəxanada olduğunu, biokimyəvi göstəricilərinin isə yaxşılaşma əlamətləri göstərdiyini deyib.
ÜST-nin fövqəladə hallara cavab üzrə meneceri Patrik Otim yoluxma mənbəyinin hələ müəyyən edilmədiyini vurğulayıb.
Otim bildirib ki, müstəntiqlər qadının xəstələndiyi vaxtdan xəstəxanaya yerləşdirildiyi ana qədərki 48 saat ərzində Abucada hansı tibb müəssisələrinə getdiyini də araşdırırlar.
Keniyadakı yoluxma halı ilə mümkün əlaqə araşdırılır
Africa CDC Nigeriyada xəstələnən qadınla Keniyada qeydə alınan ilk Ebola halı arasında mümkün əlaqəni araşdırır. Hər iki şəxsin Uqandanın Entebbe hava limanından eyni gündə yola düşdüyü müəyyən edilib.
Mankoula mümkün yoluxmanın iki xəstə arasında baş verməsinin araşdırılan ehtimallardan biri olduğunu bildirib.
Keniya ilk Ebola halını oktyabrın 6-da təsdiqləyib və bundan sonra daha səkkiz yoluxma qeydə alıb. Səhiyyə Nazirliyinin baş direktoru Patrik Amot ölkədəki ilk xəstə ilə əlaqəli 135 nəfərin hamısının müəyyənləşdirildiyini deyib.
Epidemiya Afrikada yayılmaqda davam edir
Mövcud epidemiyaya yoluxanların təxminən yarısının ölümünə səbəb olan Bundibuqyo virusu yol açıb. Hazırda bu virusa qarşı təsdiqlənmiş vaksin və ya xüsusi müalicə yoxdur.
Ebola xəstə insanların, o cümlədən xəstəlikdən vəfat edənlərin bədən mayeləri ilə birbaşa təmas nəticəsində yayılır.
Africa CDC-nin məlumatına görə, epidemiya təsirlənən dörd Afrika ölkəsində təxminən 4 700 nəfərin ölümünə səbəb olub.
