Afət Ziyadqızı
İran ABŞ-nin İordaniyada yerləşən hərbi qüvvələrinin istifadə etdiyi Müvəffəq Səlti aviabazasına raket zərbəsi endirdiyini açıqlayıb. Hücumun ABŞ-nin İran neft tankerlərinə, o cümlədən ölkənin əsas neft ixrac mərkəzlərindən biri olan Xark adası yaxınlığındakı gəmiyə zərbələrindən sonra həyata keçirildiyi bildirilib.
“Operativ Məlumat Mərkəzi-OMM” xəbər verir ki, İran İslam İnqilabı Keşikçiləri Korpusu (SEPAH) hücum zamanı aviabazadakı texniki xidmət və qırıcıların hazırlanması üçün nəzərdə tutulan anqarların, ABŞ-yə məxsus F-35, F-16 və F-15 təyyarələrinin yerləşdiyi məntəqələrin, eləcə də aviasiya sığınacaqlarının hədəf alındığını bildirib.
İran mənbələri hücum zamanı 25-40 ballistik raketin buraxıldığını yazıb.
İordaniya Silahlı Qüvvələri isə 20 ballistik raketin aşkarlandığını, onlardan 18-nin hava hücumundan müdafiə sistemləri tərəfindən ələ keçirildiyini açıqlayıb. Qalan iki raketin yaşayış olmayan əraziyə düşdüyü qeyd olunub.
