ABŞ yığmasının və "Monako" klubunun 24 yaşlı hücumçusu Folarin Balogun karyerasını başqa komandada davam etdirməyə yaxındır.
"Operativ Məlumat Mərkəzi-OMM" "The Athletic" nəşrinə istinadən xəbər verir ki, futbolçu cari mövsümün sonunda klubdan ayrılmağı ciddi şəkildə nəzərdən keçirir.
Balogun hazırda davam edən dünya çempionatında nümayiş etdirdiyi parlaq oyunla diqqət mərkəzinə düşüb. Paraqvay yığması ilə matçda (4:1) dubl edən forvard, 1930-cu ildən bəri dünya çempionatlarında bir oyunda iki qol vuran ilk amerikalı futbolçu kimi tarixə düşüb. Bundan əlavə, o, Avstraliya ilə qarşılaşmada (2:0) məhsuldar ötürmə ilə yadda qalaraq oyunun ən yaxşısı seçilib.
Hücumçunun "Monako" ilə müqaviləsi 2028-ci ilin yayına qədər qüvvədə olsa da, tərəflər arasında yeni sözləşmə ilə bağlı danışıqlar aparılmır.
Mənbənin bildirdiyinə görə, Fransa klubu oyunçunun satışından təxminən 50 milyon avro gəlir əldə etməyi hədəfləyir.
Bu məbləğ 2023-cü ildə futbolçunun transferi üçün ödənilən vəsaitdən xeyli yüksəkdir.
Qeyd edək ki, ötən mövsüm Fransa çempionatında 30 oyunda 13 qol vuran Balogun, özünü liqanın ən təhlükəli hücumçularından biri kimi təsdiqləyib.
Onun dünya çempionatındakı yüksək performansı isə potensial alıcıların marağını daha da artırıb.
