Afət Ziyadqızı
"Real Sosyedad"ın hücumçusu Mikel Oyarzabal "Barselona"ya mümkün transferi ilə bağlı yayılan iddialara münasibət bildirib.
"Operativ Məlumat Mərkəzi-OMM" xəbər verir ki, İspaniya milli komandasının üzvü Kataloniya təmsilçisinin ona maraq göstərməsi barədə xəbərlərin gündəmdə olmasını işini düzgün görməsinin göstəricisi kimi dəyərləndirib.
Məlumata görə, "Barselona" transfer bazarında argentinalı hücumçu Xulian Alvaresə alternativ variant kimi 29 yaşlı futbolçunun namizədliyini nəzərdən keçirir.
Bildirilib ki, Mikel Oyarzabal yayılan transfer xəbərlərinin onun üçün xüsusi əhəmiyyət kəsb etmədiyini vurğulayıb. Futbolçu hazırda bütün diqqətini dünya çempionatına yönəltdiyini və bu cür şayiələrə vaxt sərf etmədiyini qeyd edib.
Qeyd olunub ki, Oyarzabal son dövrlərdə nümayiş etdirdiyi uğurlu çıxışla diqqət çəkir. Hücumçu dünya çempionatı çərçivəsində İspaniya və Səudiyyə Ərəbistanı yığmaları arasında keçirilən və 4:0 hesabı ilə başa çatan görüşdə komandasının əsas qəhrəmanlarından biri olub.
Məlumata əsasən, ispaniyalı futbolçu həmin qarşılaşmada iki qola imza atıb və bir məhsuldar ötürmə ilə yadda qalıb.
