Dünya çempionatında Azərbaycanın dörd cüdoçusu mübarizəyə qoşulur

Bakıda keçirilən cüdo üzrə dünya çempionatı bu gün davam edəcək. Yarışın ikinci günündə qadınların 52 kq, kişilərin isə 66 kq çəki dərəcəsində qaliblər müəyyənləşəcək.

Azərbaycan millisinin dörd üzvü tatamiyə çıxacaq. Qadınların 52 kq çəki dərəcəsində Gültac Məmmədəliyeva 1/16 final mərhələsində İsrail təmsilçisi Gefen Primo ilə qarşılaşacaq.

Kişilərin 66 kq çəki dərəcəsində Turan Bayramov 1/32 finalda finlandiyalı Luukas Saha ilə üz-üzə gələcək. Nizami İmranov da eyni mərhələdə gürcüstanlı Vaja Marqvelaşvili ilə mübarizə aparacaq.

Ruslan Paşayev 1/16 finalda Türkmənistan təmsilçisi Serdar Rahimovla İspaniya cüdoçusu Adrian Nieto Çinarro arasındakı görüşün qalibi ilə qarşılaşacaq. İlkin mərhələnin Bakı vaxtı ilə saat 10:00-da, final blokunun isə 18:00-da başlanması nəzərdə tutulub.

Çempionatın ilk yarış günündə Azərbaycan millisinin üzvü Əhməd Yusifov 60 kq çəki dərəcəsində qızıl medal qazanaraq dünya çempionu olub.