OMM Redaksiyası
Beynəlxalq Cüdo Federasiyasının (IJF) baş katibi Liza Allan sabah Bakıda start götürəcək dünya çempionatının uğurlu keçəcəyinə əmin olduğunu deyib.
O, Azərbaycana qayıtmaqdan məmnunluğunu ifadə edib və ölkənin güclü idman ənənələri ilə cüdo tarixini vurğulayıb. Allan yarışın indiyədək təşkil edilən ən yaxşı dünya çempionatlarından biri olacağını gözlədiyini bildirib.
Bakıya 93 ölkədən nümayəndələr gəlib
IJF rəsmisi Azərbaycan Cüdo Federasiyasının prezidenti Rəşad Nəbiyevin və komandasının təşkilatçılığını yüksək qiymətləndirib. Böyüklər arasında cüdo üzrə ikinci dünya çempionatının Bakıda keçirilməsi üçün Gimnastika Arenasına qayıtmağı səbirsizliklə gözlədiklərini deyib.
Allanın sözlərinə görə, yarışda 93 ölkədən nümayəndələr iştirak edəcək. O, cüdo ictimaiyyətinin dəstəyinin turnirin uğurlu keçəcəyinə inam yaratdığını qeyd edib.
Hidayət Heydərov barədə danışıb
Azərbaycan cüdoçularının perspektivlərinə toxunan baş katib Hidayət Heydərovun son dövrdə çətinlik yaşamasını da şərh edib. Allan bildirib ki, yüksək səviyyəli idmançı üçün daim zirvədə qalmaq asan deyil, lakin çətin dövr yaşayan idmançılar əvvəlki səviyyələrinə qayıda bilirlər.
O, cüdoda hər kəsin qalib gələ biləcəyini vurğulayıb: qarşılaşmaların nəticəsi bir yarışdan digərinə dəyişə bilər. Allan sonda Bakıdakı çempionatın Azərbaycan üçün uğurlu olacağına əminliyini ifadə edib.
