Azərbaycan cüdoçularının Özbəkistanın paytaxtı Daşkənddə keçiriləcək gənclər arasında dünya çempionatındakı ilk rəqibləri müəyyənləşib. Turnir noyabrın 19-dan 22-dək keçiriləcək.
Azərbaycan fərdi yarışlarda 10 çəki dərəcəsində 14 idmançı ilə təmsil olunacaq: 9 oğlan və 5 qız. Dünya çempionatında 78 ölkədən 574 cüdoçu iştirak edəcək.
Qızların rəqibləri
48 kq-da Nərgiz Əhmədova 1/16 finalda çilili Maria Valensiya ilə qarşılaşacaq. Eyni mərhələdə 52 kq-da Aysun Məmmədovanın rəqibi kanadalı Rima Burihandır.
57 kq-da Xədicə Qədəşova Selin Bestav (Türkiyə) – Nino Xaraişvili (Gürcüstan) görüşünün qalibi ilə üz-üzə gələcək. Vüsalə Hacıyeva isə sloveniya təmsilçisi Nika Tomtsla qarşılaşacaq. 63 kq-da Hanna Zaytsevanın rəqibi gürcüstanlı Mariam Natelauridir.
Oğlanların rəqibləri
60 kq-da Ayxan Mirzəzadə Gavreil Şanran Lu E Xan (Honkonq) – Stratos Xaralampus (Kipr) cütünün qalibi ilə görüşəcək. 66 kq-da Məhəmməd Musayev Maqni Lauritsen (Danimarka) – Yun Vinq Yat (Honkonq) qarşılaşmasının qalibi ilə qarşılaşacaq.
81 kq-da Mehdi Abbasov 1/32 finalda italiyalı Edoardo Mikele Russo ilə, Cəsur İbadlı isə küveytli Anas Buqammazla güləşəcək. 90 kq-da Süleyman Şükürov 1/16 finalda Nikolas Zadvinski (ABŞ) – İnomjon Baxodirov (Özbəkistan) görüşünün qalibi ilə qarşılaşacaq. Həmin çəkidə 1/32 finalda Aslan Kotsoyevin rəqibi özbəkistanlı Dilşod Naşirovdur.
100 kq-da Davud Namazlı 1/16 finalda qırğızıstanlı Fadil Məhəmməd İsmaqombetovla, Canpolad Əliyev isə 1/32 finalda ukraynalı İvan Harmaşla güləşəcək. +100 kq-da Ramazan Əhmədovun 1/16 finaldakı rəqibi monqolustanlı Temuulen Munxçuluundur.
Kontekst
Noyabrın 10-da açıqlanan ilkin heyətə əsasən, Azərbaycan Daşkənddəki gənclər arasında dünya çempionatına 14 cüdoçu ilə qatılacaq: 9 oğlan və 5 qız.